КРЫВАКРЫЖ

Гісторыю Крывакрыжа прынята адлічваць ад першага публічнага выступу пад час музычнага фэсту Crivia aeterna ў 2008 г.
Але гісторыя стварэння альбому Малітвы вайны пачалася тады, калі за год да таго ў лесе пад Мiнскам у лагеры Белага Легіёну ўпершыню прагучала песня "Я паеду заўтра на вайну". Перад тым, створаны Алесем Мікусам "Гімн Белага Легіёну" ўжо колькі гадоў як быў вядомы і нават запісаны ў дудовым выкананні.
Менавіта тады была высунутая і падтрыманая думка запісаць вялікі альбом – паўнавартае музычнае ўвасабленне ваяўнічых патрыятычных настрояў. Падтрымка Белага Легіёну паспрыяла з’яўленню першага спробнага запісу песень – у фартэпіянным суправаджэнні.
Ініцыятыва запісаць альбом з багацейшым аранжаваннем і ў складзе паўнавартага гурта належала магілёўскаму музыку і выдаўцу Лявону Падляцкаму, які ў кампаньёны запрасіў мінскага дызайнера і музычнага крытыка Ігара Мацюнова, ініцыятара штогадовага фэсту Crivia aeterna. На працягу 2008 г. альбом Малітвы вайны быў запісаны.
* * *
Ідэю беларуска-літоўскага музычнага дыску У каралеўскіх далонях падала Бірута Янушкайце, намесніца старшыні Саюзу літоўскіх пісьменнікаў, пад час міжнароднага літаратурнага пленэру ў літоўскіх Друскеніках у чэрвені 2008 г., дзе ў складзе беларускіх удзельнікаў прысутнічаў Алесь Мікус. З літоўскага боку вершы паэтаў агучылі музыкі Гедрус Гербачаўскас і Марус Салінас. Прэзентацыя альбому адбылася ў літоўскай сталіцы Вільні калядным вечарам 2008 г. За падтрымку праекту трэба таксама дзякаваць старшыні Саюзу беларускіх пісьменнікаў Алесю Пашкевічу.

* * *

Запіс музыкі “Крывакрыжа” ажыццяўлялі:
Алесь Мікуc – раяль, спеў
Ларыса Прэабражэнская – скрыпка
Дзмітры Касцюшка – труба
Кацярына Ўласенка – акардэон
Сяргей Мікалаенка – віяланчэль, рытмоўка, аранжаванне

Меладычнае і паэтычнае рашэнне музыкі гурта Крывакрыж належыць завадатару гурта Алесю Мікусу.

На альбоме Малітвы вайны прысутная песня на верш беларускага пісьменніка і паэта ХХ ст. Уладзіміра Караткевіча - Рагнарадзі, а таксама дудовая варыяцыя Гімну Белага Легіёну ў выкананні Змітра Сасноўскага.

Песні беларускай паловы альбому У каралеўскіх далонях напісаныя на ўрытмаваны пераклад Алесем Мікусам вершаў літоўскіх паэтаў Дайнюса Сабяцкiса, Рэгіны Кацінайце-Лумпіцкене, Валдаса Гядгаўдаса, Энрыкі Страгайце і Віктараса Рудзянскаса.