Алаша ұрпағы

Шежіреге бай қазақ тарихының ақтаңдақ беттері тағы бір батырдың есімімен толықты. Мәскеудегі мұрағаттан кіші жүздің Алаша руынан шыққан батыр Байбарақ Құдайқұлұлы туралы деректер табылды. Құжаттарда Байбарақ батырдың өз заманындағы беделі баяндалыпты. Ол, 18-ғасырдың өкілі. Ел аузындағы аңызға сенсек, бала кезінде қалмақтардың қолына түскен. Одан құтылғасын ата жауына қарсы жорыққа шыққан. Тіпті қалмақ батырын жекпе-жекте шақырып, тізе бүктірген. Содан бастап есімі Алаша руының ұранына айналған. Бұл кезде ол бар-жоғы 14 жаста болыпты. Ал, нақты құжаттардың табылуы Байбарақ батырдың өмірде болғандығының куәсі. Ғалымдар елінің ертеңі үшін өмірін ат жалында өткізген батырларды, әлі күнге түгендей алмай отырғанымызды мойындайды. Бүгін де үш ғасырлық тарихы бар құжаттардың әбден тозғанын алға тосқан ресейліктер, Қазақстанға қатысы бар құнды деректердің көшірмесін жасауға тыйым салып отыр. Әрі, әр құжат үшін жоғары мөлшерде ақы талап етіп, тарихшыларға тұсау салған.